Hansruedi Knöpfli     Winterthur 
                                                                                                                                                                                                                                                                                                       Für und von Winterthur
 

über mi


Ich bi im November 1966 gebore und wohne jetzt siit 2.5 Jahr in Winterthur, dere tolle Stadt, wo alles hät und wenn nid Welt bewegends passiert, denn wird das au so bliibe.

Glernt hani mal Bahnbetriebsdisponent bir SBB und bi denn au scho i junge Jahre Vorstand vomene Bahnhof worde. Well d'SBB damals d' Militärkarriere für Vorständ knickt hett, isch das mit em Offizier denn nüd meh worde.

Dur en Zuefall bini zu Anheuser-Busch cho (damals die gröschti Brauerei uf de Welt) und ha für d'Marke "Budweiser" dörfe wirke, spöter dänn zu TheBeerCompany mit Marke wie "Miller", "Foster's", usw.
Mit Wiiterbildig isch es denn losgange. Pressesprecher FH, eidg. Marketingplaner FA, eidg. Verkaufskoordinator FA, eidg. Dipl. Verkaufsleiter, eidg. Dipl. Marketingleiter (was hüt MBA-Stufe isch).

2002 hani mit de Brigitte Oertli SWISS MARKETING ACADEMY gründet. Hüt isch das s'gröschti Institut für Bruefsbildig im Marketing, Verchauf, Event, Sponsoring und Kommunikation - für Studente uf em zweite Bildigsweg.








Privats

Ich bi weder ghürote, no gschiede, no inere Beziehig und wohne in Winterthur; im Gerschtelager vo de alte Brauerei Haldeguet.


Min Fründeschreis und mis  Beziehigsnetz isch würkli gross und ich umgib mich gern mit Mensche wo spannendi Lebesläuf händ. Und das sind eifach ganz, ganz viel.








Politisch
Genau i de Mitti, das sait mis Profil uf em Politportal Vimentis - im Jahr 2019 erhobe.

Freud hani, wenn mer öppis cha verändere, wenn mer #vorwärts chunnt.

Bi Eus i de Partei chammer aber au mal links und mal rechts uuschäre.

Tja und jetzt - jetzt bini Alt- Kantonsrat vom Kanton Zürich für BDP.







Brueflich

Bi Eusem Unternehme SWISS MARKETING ACADEMY bini CEO.

Well mich Musig, Event und Sponsoring interessiert, bini au Verwaltigsrat bi de Rock the Ring AG. Mir veraastalt-et jedes Jahr Rock the Ring im Autobahnkreisel in Hinwil. 





Freiziit

Die isch leider ehner chli rar worde i de letschte Zyt. Ich versueche mich über die elektronische Medie z'in-formiere und achte druf, das min Schrittzähler jede Tag uf 12'000 Schrittli chunnt.


Ich reise gern und interessier mich für Musig, obschon ich das mit em Klavierspiele irgendwänn us Rück-sicht uf anderi ufgäh ha.

Ich ha immer no de Welt-rekord im Pedalofahre und bi scho 24 Mara-thon in 18 Tag glaufe.
Und mit enere Schuelklass Zürich-Paris i 10 Tag.



Denn alles was ich mache, das mach ich us Freud und Luscht dra, es grad i dem Moment z'mache. Das isch natürli nid immer glich und au persönliche Gfühl und Schwankige underworfe. Wenn ich gern schriebe, denn höckli an PC und lege los.

Dänn schrieb ich es Buech, en Text für e Ziitig oder irgendwas i de soziale Medie oder a de Homepage.

Min Job machi immer no sehr gern, junge Mensche öppis biizbringe, aber au mich mit Zahle umeschlah. Schaffe gern mit mim Team und jede Mäntig gangi immer no gern in Kantonsrat. Well's spannend isch, zum gseh, was mer cha bewege. Denn me cha au als chlini Partei mit Fraktionsstärki immer no öppis bewege. Und oft spieled mir chline Parteie denn grad s'Züngli a de Waag.


 
 
Anrufen
Email
Info